ಸಂಸಾರ್

ಸಂಸಾರ್

ಜಾಲ್ಲೆಂ ಸಗ್ಳೆಂ ಬರ‍್ಯಾಕ್‌ಚ್ ಜಾಲಾ

ಜಾಂವ್ಚೆಂ ಬರೆಂಚ್ ಜಾವ್ನ್ ಆಸಾ

ಜಾಂವ್ಕ್ ಆಸ್ಚೆಂ ಬರೆಂಚ್ ಜಾಂವ್ಕ್ ಆಸಾ

ರುದನ್ ಕರುಂಕ್ ತುವೆಂ ಹೊಗ್ಡಾಯ್ಲೆಂಯ್ ಕಿತೆಂ?

ಹೊಗ್ಡಾಂವ್ಕ್ ತುವೆಂ ಹಾಡ್ಲೆಂ ತರೀ ಕಿತೆಂ?

ನಾಸ್ ಜಾಂವ್ಕ್ ತುವೆಂ ಕೆಲ್ಲೆಂ ತರೀ ಕಿತೆಂ?

ತುವೆಂ ಕಿತೆಂ ಘೆತ್ಲಾಯ್ ತರ್

ತೆಂ ಹಾಂಗಾ ಥಾವ್ನ್‌ಚ್ ಘೆತಾಂಯ್

ಕಿತೆಂಯ್ ದಿಲಾಯ್ ತರ್ ತೆಂ ಹಾಂಗಾ ಥಾವ್ನ್‌ಚ್ ದಿಲಾಯ್

ಕಾಲ್ ಕೊಣಾಚೊಗೀ ಜಾವ್ನಾಸ್‌ಲ್ಲೊ

ಆಜ್ ತುಜೊ ಜಾಲಾ

ಫಾಲ್ಯಾಂ ಆನಿ ಕೊಣಾಚೊಗೀ ಜಾವ್ನ್ ಆಸ್ತಲೊ

ಅಶೆಂ ವಾಚ್ಲೆಂ ಹಾಂವೆಂ ಮ್ಹಜ್ಯಾ ಇಷ್ಟಾಚ್ಯಾ ಘರ‍್ಚ್ಯಾ ವೊಣ್ತಿರ್.

ನಿಜಾಯ್ಕಿ ತಾಚೆಲಾಗಿಂ ನಾ ತಾಚೆಂಚ್ ಮ್ಹಳ್ಳೆಂ ಬಿಡಾರ್

ಕುಟ್ಮಾಚ್ಯಾಂನಿ ಮೆಳೊನ್ ಘಾಲ್ಲೆಂ ತಾಕಾ ವಾಟೆರ್

ಚಿಂತ್ನಾಂನಿ ಭರೊನ್ ಪಡ್ಲೊ ತೊ ಪಿಡೆರ್.

ಕಳ್ಳೆಂ ಮ್ಹಾಕಾ ಉಪ್ರಾಂತ್, ಹೆಂ ಸಗ್ಳೆಂ ಆಸ್ತಿ ಖಾತಿರ್

ಭರ‍್ಲೆಂ ಹಾಂವೆಂ ಧಯ್ರ್ ತಾಚ್ಯಾ ಮತಿರ್

ಜಿಯೆ ತುಂ ದೆವಾಚ್ಯಾ ಉತ್ರಾಂಚೆರ್

ಕೋಣ್ ಸಾಂಡ್ಲ್ಯಾರೀ ದೇವ್ ಸಾಂಡಿನಾ ನಿರಂತರ್

ಮಾಲ್ಘಡ್ಯಾಂನಿ ಪಾಳ್ನ್ ಆಯಿಲ್ಲಿ ರಿವಾಜ್ ಆಮಿ ಮೊಡ್ತಾಂವ್

ದೆವಾಕ್ ಸೊಡ್ತಾಂವ್, ಕಾನೂನಾಚ್ಯಾ ಧೈರಾನ್ ವಾಡ್ತಾಂವ್

ಸೊಸ್ಣಿಕಾಯ್-ಸೊಡ್‌ದೊಡ್ ಆಮಿ ನಾಕಾರ್ ಕರ‍್ತಾಂವ್

ಪವಿತ್ರ್ ಸಭೆಕ್ ಸಾಂಡ್ತಾಂವ್, ವಕೀಲಾಂಚ್ಯಾ ಉತ್ರಾಂಕ್ ಬಲಿ ಜಾತಾಂವ್

ಕಾನೂನ್ ಜಾಯ್ ಆಮ್ಕಾಂ ಜಾಂವ್ಚ್ಯಾ ಅನ್ನ್ಯಾಯಾಂಕ್

ಸೊಡ್‌ದೊಡ್ ಆಸ್ತಾನಾ ಪವಿತ್ರ್ ಸಭಾ ಆಸ್ತಾ ಆಮ್ಚ್ಯಾ ನ್ಯಾಯಾಕ್

ಸಮ್ಜೊನ್ ಘೆಂವ್ಕ್ ಜಾಯ್ ಆಮಿ ವಯ್ಲೆಂ ಉತರ್

ಜಲ್ಮೊನ್, ವಾಂಚೊನ್, ಮರೊಂಕ್ ಆಸ್ಚ್ಯಾ ಹ್ಯಾ ಸಂಸಾರಾರ್

- ಹೆರಾಲ್ಡ್ ಮೊಂತೇರೊ,

ಸಾಂ. ತೆರೆಜ್ ವಾಡೊ