ಚಲಿ

ಚಲಿ

ಚಲಿ ಜಾವ್ನ್ ಜಲ್ಮಾಲ್ಲ್ಯಾಕ್

ಜಿವಿತ್ ಮಾರೆಕಾರ್

ಚಲಿಯೆಕ್ ಸ್ವಾತಂತ್ರ್ ನಾ

ಚಲ್ಯಾಕ್ ಅಧಿಕಾರ್......

ಫಾಮಾದ್ ಗಾವ್ಪಿ ದೆ| ವಿಲ್ಫಿ ರೆಬಿಂಬಸಾನ್ ಹ್ಯಾ ಪದಾಂತ್ ಚಲಿಯೆಚಿ ಆನ್ವಾರಾಂ ವರ‍್ಣಿಲ್ಯಾಂತ್. ತ್ಯಾಚ್‌ಪರಿಂ ಆಯ್ಚ್ಯಾ ಹ್ಯಾ ಆಧುನಿಕ್ ಸಂಸಾರಾಂತ್ ಘಡೊನ್ ಆಸಾ. ಆಮ್ಚೊ ಹೊ ಸಂಸಾರ್ ಕಿತ್ಲೊ ಸುಧಾರ‍್ಲ್ಯಾರ್‌ಯೀ, ಚಲಿ ಹರ‍್ಯೆಕಾ ವಾವ್ರಾಂತ್ ಮುಕಾರ್ ಆಸ್ಲ್ಯಾರ್‌ಯೀ, ಆಪುಣ್ ಖಂಚ್ಯಾಂತ್‌ಯೀ ಉಣೆಂ ನಾ ಆನಿ ಆಪುಣ್ ಪುರಷಾಕ್ ಸಮಾನ್ ಆಸಾಂ ಮ್ಹಣ್ ರುಜು ಕೆಲ್ಯಾರ್‌ಯೀ ತಿಚೆ ವಯ್ಲಿಂ ಆನ್ವರಾಂ ಚುಕಾನಾಂತ್. ಹರ‍್ಯೆಕಾ ತಿಚ್ಯಾ ಮೆಟಾಂನಿ ತಿಕಾ ಆನ್ವಾರಾಂ ರಾಕೊನ್ ಆಸೊನ್, ತಿಚೆಂ ಸ್ವತಂತ್ರ್ ವಾ ಆಪ್ಲೆಂಪಣ್ ರಾಕೊನ್ ವರುಂಕ್ ಸಾಧ್ಯ್ ಜಾಯ್ನಾ. ಆಯ್ಚ್ಯಾ ದಿಸಾಂನಿ ಹರ‍್ಯೆಕ್ ದೀಸ್ ಆನಿ ಘಡಿ ಮ್ಹಳ್ಳೆಪರಿಂ ಏಕ್ ನಾ ತರ್ ಎಕಾ ರಿತಿನ್ ಚಲಿ ಕಾಮುಕಾಂಚ್ಯಾ ಕೃತ್ಯಾಂಕ್ ವಳಗ್ ಜಾವ್ನ್ ಆಪ್ಲೆಂ ಜಿವಿತ್ ಹೊಗ್ಡಾವ್ನ್ ಆಸಾ. ಚಲಿ ಆಪುಣ್ ಕಿತ್ಲಿ ಪ್ರಬಲ್ ಮ್ಹಣ್ ರುಜು ಕರ‍್ತಾ, ತಿತ್ಲಿಂ ದುರ್ಬಲ್ ಜಾತೆಂ ಆಸಾ. ಪುರುಷ್ ಪ್ರದಾನ್ ಹ್ಯಾ ಸಂಸಾರಾಂತ್ ಚಲಿಯೆಚೆ ಸ್ವತಂತ್ರ್ ಉಣೆಂ ಜಾವ್ನೆಂಚ್ ಆಸಾ. 

ಚಲಿಯೆಚೆಂ ನೆಸಾಪ್ ಆನಿ ವರ‍್ತನ್ ದುಸ್ರ್ಯಾಂಕ್ ಹೊಂದೊನ್ ಆಸಾಜೆ ಮ್ಹಣ್ ನಾ ತರೀ ತೆಂ ಬರ‍್ಯಾ ದೆಕಿಚೆಂ ಆನಿ ಸಮಾಧಾನ್ ಹಾಡ್ತಾ ತಸಲೆಂ ಆಸ್ಲ್ಯಾರ್ ಬರೆಂಚ್. ಚಲಿ ಕಿತ್ಲ್ಯಾ ಬರ‍್ಯಾ ದೆಕಿನ್ ಆಸ್ಲ್ಯಾರ್‌ಯೀ ಲೋಕ್ ತಿಕಾ ಹಿಣ್ಸುನ್‌ಚ್ ಆಸ್ತಾ.

ಗಾಂಧೀಜಿಚ್ಯಾ ಸಾಂಗ್ಣೆ ಪ್ರಕಾರ್ ಖಂಚ್ಯಾ ದಿಸಾ ಮಧ್ಯಾನ್ ರಾತಿಂ ಚಲಿ ಎಕ್ಲಿಚ್ ರಸ್ತ್ಯಾರ್ ಚಲೊನ್ ಶಾಭಿತಾಯೆನ್ ಘರಾ ಪಾವ್ತಾಗೀ ತ್ಯಾಚ್ ದಿಸಾ ಆಮ್ಕಾಂ ಖರೊ ಸ್ವಾತಂತ್ರ್ ಮೆಳ್ತಾ. ದೆಕುನ್ ಪುರುಷ್ ಪ್ರಧಾನ್ ಆಯ್ಚ್ಯಾ ಹ್ಯಾ ಸಂಸಾರಾಂತ್ ಹರ‍್ಯೆಕ್ಲ್ಯಾಂನಿ ಚಲಿಯೆಕ್ ಮಾನ್ ಅನಿ ಗೌರವ್ ದೀಂವ್ಕ್ ಜಾಯ್. ಹರ‍್ಯೆಕ್ಲ್ಯಾಚಿ ಆವಯ್, ಭಯ್ಣ್, ಪತಿಣ್ ಜಾವ್ನಾಸಾ ಏಕ್ ಸ್ತ್ರೀ ಮ್ಹಳ್ಳೆಂ ಸಮ್ಜೊನ್ ಘೆವ್ನ್ ತಿಕಾ ಸಮಾನ್ ರಿತಿನ್ ಪಳೆವ್ನ್ ಗೌರವ್ ದಿಲ್ಯಾರ್ ಆನಿ ತಿಚ್ಯಾ ಹರ‍್ಯೆಕಾ ವಾವ್ರಾಂತ್ ತಿಕಾ ಪಾಟಿಂಬೊ ದಿಲ್ಯಾರ್ ತಿಚೆವಯ್ಲಿಂ ಆನ್ವಾರಾಂ ಉಣೆ ಜಾವ್ನ್ ತಿ ಸ್ವತಂತ್ರ್ ರಿತಿನ್ ಜಿಯೆಂವ್ಕ್ ಸಾಧ್ಯ್ ಜಾತೆಲೆಂ.

ಚಲಿ ಜಾವ್ನಾಸಾ ಕುಟ್ಮಾಚೆಂ ಬಳ್. ಏಕ್ ಕುಟಮ್ ಸಾಂಬಾಳ್ನ್ ವರ‍್ಚೆಂ ದೆಣೆಂ ಚಲಿಯೆಕ್ ಲಾಬ್ಲಾಂ. ದೆಕುನ್ ಕುಟ್ಮಾಂತ್ ತಿಕಾ ತಿಚೊ ಗೌರವ್ ದೀವ್ನ್ ತಿಚೊ ಸ್ಥಾನ್ ತಿಣೆಂ ಸಾಂಬಾಳ್ನ್ ವರುಂಕ್ ಆಮ್ಚೊ ಸಹಕಾರ್ ಅತೀ ಗರ‍್ಜೆಚೊ.

- ವಿಲ್ಮಾ ಜೀವನ್ ಮೊಂತೇರೊ,

ಮಿನಿನ್ ಜೆಜು ವಾಡೊ, ಮಂಜೇಶ್ವರ್