ವೆಳಾ, ಮ್ಹಾಕಾ ಭೊಗ್ಶಿ!!!!!

ವೆಳಾ, ಮ್ಹಾಕಾ ಭೊಗ್ಶಿ!!!!!

ಸುರ‍್ವೆರ್ ಥಾವ್ನ್ ಆಸ್‌ಲ್ಲೊ ವೇಳ್,

ಹರ‍್ಯೆಕ್ ಘಡಿ ತಾಚೊಚ್ ತೊ ಖೆಳ್,

ತುಜೊ ತೊ ಮಹತ್ವ್ ವರ್ಣುಂಕ್ ಜಾಯ್ನಾ,

ತುಜ್ಯಾ ಮುಖಾರ್ ಹಾಂವ್ ಕಾಂಯಿಚ್ ನಾ.

ಸುರ್ಯಾ ವರ್ವಿಂ ತುಕಾ ತಾಣೆಂ ಪಾರ್ಕಿಲೆಂ,

ಉಪ್ರಾಂತ್ ವೊಣ್ತಿಂನಿ ಗಡಿಯಾರ್ ಕರುನ್ ಉಮ್ಕಾಳಯ್ಲೆಂ,

ಹರ‍್ಯೆಕ್ಲ್ಯಾಂಚ್ಯಾ ಹಾತಾಂನಿ ಆತಾಂ ಆಸಾಯ್,

ದೀವ್ನ್ ತಾಂಚ್ಯಾ ವಸ್ತ್ರಾಂಕ್ ಸೊಭಾಯ್.

ದಿಸೊನ್ ಯೆತಾಯ್ ರುಪಾಂತ್ ತುಂ ವೀಸ್-ತೀಸ್

ಸೆಕುಂಡ್, ಮಿನುಟ್, ಘಂಟೊ, ದೀಸ್,

ಹಫ್ತೊ, ಮಹಿನೊ, ವರಸ್ ಸಬಾರ್,

ಆಸಾ ತುಜೆಸಂಗಿಂ ಹಜಾರ್ ಹಜಾರ್ ಖಬಾರ್.

ತುಂ ಸದಾಂಯ್ ಯೆತಾಯ್ ಆನಿ ವೆತಾಯ್,

ಕರುಂಕ್ ನಾ ಹಾಂವೆಂ ಪರ್ವಾ ತುಜಿ ಕಾಂಯ್,

ಸಮ್ಜಣಿ ಆಸ್ಲ್ಯಾರೀ ಚಾಲಿ ನಾತ್‌ಲ್ಲ್ಯಾಪರಿ,

ಗಳ್ಸುಂಕ್ ನಾ ತುಕಾ, ಜಾಲಿಂ ಹಾಂವ್ ಆಳ್ಶಿ ಬರಿ.

ತ್ಯಾ ತುಜ್ಯಾ ಭುರ್ಗ್ಯಾಂಕ್ ಫಾವೊ ನಮಾನ್,

ಸಮ್ಜೊನ್ ತುಜೊ ಮಹತ್ವ್, ದಿಲೊ ತುಕಾ ಸ್ಥಾನ್,

ಸೆಕುಂಡ್ ಸಮೇತ್ ಕರಿನಾಸ್ತಾ ಪಾಟ್ ದಿಲೊ ಮಹತ್ವ್,

ಹೆಂಚ್ ತಾಂಚ್ಯಾ ತ್ಯಾ ಜಯ್ತಾಚೊ ಸತ್ವ್.

 

ವೆಳಾ, ಭೊಗ್ತಾ ಮ್ಹಾಕಾ ಆತಾಂ ದೂಕ್

ಕೆಲಿಂ ಮ್ಹಣ್ ಹಾಂವೆಂ ವ್ಹಡ್ ಚೂಕ್,

ಜಾತೆಂ ಕೊಣ್ಣಾ ಕಿತೆಂ ಕಿತೆಂ ಆಜ್, ವ್ಹಾ!

ಕೆಲ್ಲೆಂ ತರ್ ಹಾಂವೆಂ ಸದುಪಯೋಗ್ ತುಜೊ.

ಆನಿ ತರ್‌ಯೀ ಬದಲ್ತೆಲಿಂ, ಹೆಂ ಮ್ಹಜೆಂ ಭಾಸ್,

ಗಳ್ಸುನ್ ತುಕಾ, ಯೆತಲಿಂ ರಂಗ್-ರಂಗಾಂನಿ ರಾಸ್ ರಾಸ್,

ಆನಿ ಪುಣೀ ದಿತೆಲಿಂ ಹಾಂವ್ ತುಕಾ ಮಾನ್,

ಆನಿ ಪುಣೀ... ವ್ಹಯ್ ಆನಿ ಪುಣೀ...

- ಗ್ರಿಫಿತ್ ಜೆನಿಫರ್ ಮೊಂತೇರೊ, ಮರ್ಸಿವಾಡೊ