ಮ್ಹಾಕಾ ಸಾಧ್ಯ್ ಆಸಾ
ಮುಖಾಂತ್ರ್ ಮೆಳ್ಚ್ಯಾ ಪಯ್ಶಾಂತ್ ಜೀವನ್ ಉತ್ತಮ್ ಕರುಂಕೀ ಸಾಧ್ಯ್ ಜಾತಾ.
19ವ್ಯಾ ಶತಮಾನಾಂತ್ ಇಂಗ್ಲೆಂಡಾಂತ್ ಏಕ್ ಜೊಡೆಂ ಆಸ್‌ಲ್ಲೆಂ. ಘೊವ್ ಸರ್ಕಾರಿ ನೌಕರ್. ಏಕ್ ದೀಸ್ ದನ್ಪರಾಂ ಘೊವ್ ಘರಾ ಯೇವ್ನ್ ಆಕಾಸ್‌ಚ್ ಮಾತ್ಯಾ ವಯ್ರ್ ಪಡ್ಲೆಬರಿ ಬಸ್ಲೊ. ಬಾಯ್ಲ್ ಕಿತೆಂ ಜಾಲೆಂ ಮ್ಹಣ್ ವಿಸಾರ‍್ತಾನಾ, ಘೊವ್ ಮ್ಹಾಕಾ ಕಾಮಾ ಥಾವ್ನ್ ಕಾಡ್ಲಾಂ. ಮುಕಾರ್ ಕಶೆಂ ಜೀವನ್ ಚಲೊಂವ್ಚೆಂ ಮ್ಹಣ್ ಕಳನಾ ಮ್ಹಣಾಲೊ. ತವಳ್ ಬಾಯ್ಲ್ ಕೊಣಾಕ್‌ಯಿ ದುರ್ಸಾನಾಸ್ತಾನಾ ಘೊವಾಕ್ ಸಮಾಧಾನ್ ಕರ್ನ್ ಕಾಗದ್ ಆನಿ ಪೆನ್ ಹಾಡ್ನ್ ತಾಚ್ಯಾ ಹಾತಾಂತ್ ದೀವ್ನ್, ಕಾಮ್ ಗೆಲ್ಲೆಂ ಬರೆಂಚ್ ಜಾಲೆಂ. ಮಸ್ತ್ ತೆಂಪಾ ಥಾವ್ನ್ ಕಾಣಿಗೀ, ಕಾದಂಬರಿಗೀ ಬರಯ್ಜೆ, ವೇಳ್‌ಚ್ ನಾ ಮ್ಹಣ್ ತುಂ ಮ್ಹಣ್ತಾಲೊಯ್‌ನೇ! ಆತಾಂ ಬರಯ್ ಮ್ಹಣಾಲಿ. ಘೊವ್ ಹಾಸೊನ್ ಬರಂವ್ಕ್ ವೇಳ್ ಮೆಳ್ಳಾ ವ್ಹಯ್ ಪುಣ್ ಜೀವನ್ ಚಲೊಂವ್ಚೆ ಕಶೆಂ ಮ್ಹಣ್ ವಿಚಾ‍ರ‍್ತಾಂ. ತವಳ್ ತಿ,
ತುವೆಂ ಘರ‍್ಚ್ಯಾ ಖರ‍್ಚಾಕ್ ಮ್ಹಣ್ ದಿಲ್ಲ್ಯಾ ಪಯ್ಶಾಂತ್ಲೆಂ ಇಲ್ಲೆ ಹಾಂವೆಂ ಉರಯ್ಲ್ಯಾತ್, ತಾಂತುನ್ ಕಶೆ ಸಾತ್ ಮಹಿನೆ ಸಾರ‍್ಯೆತ್. ಖಂತ್ ಕರಿನಾಕಾ, ಬರೊಂವ್ಚ್ಯಾಂತ್ ಗಮನ್ ದಿ ಮ್ಹಣಾಲಿ. ಘೊವಾನ್ ಬರಂವ್ಕ್ ಸುರು ಕೆಲೆಂ, ಪಾಂಚ್ ಮಹಿನ್ಯಾ ಭಿತರ್ ತಾಚಿ ಪಯ್ಲಿ ಕಾದಂಬರಿ “ದಿ ಸ್ಕಾರ್ಲೆಟ್ ಲೆಟರ್” ಪ್ರಕಟ್ ಜಾಲಿ. ಅಶೆಂ ನಾಂವಾಡ್ದಿಕ್ ವ್ಯಕ್ತಿ ತೊ ಜಾಲೊ. ತಾಚೆ ಉಪ್ರಾಂತ್ “ಹೌಸ್ ಆಫ್ ಸೆವೆನ್ ಗೇಬಲ್ಸ್” , “ದಿ ಮಾರ್ಬಲ್ ಫಾನ್” ಅಶೆಂ ಕಾದಂಬರಿ ಬರಯ್ಲ್ಯೊ. ಸರ್ಕಾರಿ ನವ್ಕರಾ ಥಾವ್ನ್ ನಾಂವಾಡ್ದಿಕ್ ಕಾದಂಬರಿಕಾರ್ ಜಾಲ್ಲ್ಯಾ ವ್ಯಕ್ತಿಚೆಂ ನಾಂವ್ ನಥಾನಿಯಲ್ ಹಥೋರ್ನ್. ಹೊ ಪ್ರಸಂಗ್ ಜಾವ್ನ್ ದೇಡ್ ಶತಮಾನ್ ಜಾಲಾ. ಆತಾಂಯೀ ತಾಚೆಂ ನಾಂವ್ ಆನಿ ಕಾದಂಬರಿ ಇಂಗ್ಲಿಷ್ ಸಾಹಿತ್ಯಾಂತ್ ಅಮರ್ ಜಾಲಾಂ.
ನಥಾನಿಲಯ್ ಹಥೋರ್ನ್ ಬಾಯ್ಲೆನ್ ದಿಲ್ಲ್ಯಾ ಎಕಾ ಪ್ರೋತ್ಸಾವಾಚೆಂ ಉತರ್ ಆಯ್ಕುನ್, ತಿತ್ಲೆ ಸಾಧನ್ ಕರುಂಕ್ ತಾಕಾ ಸಾಧ್ಯ್ ಜಾಲೆಂ. ಆಮ್ಕಾಂ ತಿ ಕೋಣ್ ಮ್ಹಣ್ ಕಳಿತ್ ನಾ ತರೀ ತಿಚ್ಯಾ ಪ್ರೋತ್ಸಾವಾಚ್ಯಾ ಉತ್ರಾಕ್ ಆಮ್ಚೊ ಸಲಾಮ್. ಆಮ್ಕಾಂಯೀ ಆಮ್ಚ್ಯಾ ಕುಟ್ಮಾಂತ್ ಜಾಂವ್ದಿ, ಬಾಯ್ರ್ ಜಾಂವ್ದಿ, ಸಂಘ್-ಸಂಸ್ಥ್ಯಾಂತ್ ಜಾಂವ್ದಿ ಕೊಣೀ ಪ್ರೋತ್ಸಾಹ್ ಕರುನ್ ಆಸೊಂಕ್ ಪುರೊ. ಆಮಿ ಇಲ್ಲೆಂ ಪುಣಿ ಪ್ರೇತನ್ ಕೆಲ್ಯಾರ್ ದಾಕ್ಟೆ ಕವಿ, ಲೇಖಕ್, ಕಾದಂಬರಿಕಾರ್ ಜಾಂವ್ಕ್ ಸಾಧ್ಯ್ ಆಸಾ.
ಅಸಾಧ್ಯ್ ಮ್ಹಳ್ಳೆಂ ಕಾಂಯಿಂಚ್ ನಾ.
ಅಸಾಧ್ಯ್ ಮ್ಹಳ್ಳೆ ಸಬ್ದ್‌ಚ್ ಪುಸುನ್ ಕಾಡ್‌ಲ್ಲ್ಲ್ಯಾ ವ್ಯಕ್ತಿಚಿ ಆತ್ಮ ಚರಿತ್ರಾ ಆಮಿ ವಾಂಟುನ್ ಘೆವ್ಯಾಂ. ಹ್ಯಾ ಸಂಸಾರಾಂತ್ ಚಾರ್ ಕೊರೊಡಾಂಚ್ಯಾಕ್‌ಯೀ ಚಡ್ ಪ್ರತಿಯೊ ವಿಕುನ್ ಗೆಲ್ಲೊ ಬೂಕ್ ಆನಿ ತಾಚೆ ಲೇಖಕ್ ಕೋಣ್ ಜಾಣಾಂತ್‌ಗೀ? ಬುಕಾಚೆ ನಾಂವ್ “ಥಿಂಕ್ ಆಂಡ್ ಗ್ರೋ ರಿಚ್” ಲೇಖಕ್ ನೆಪೋಲಿಯನ್ ಹಿಲ್. ತಾಚಾಕೀ ಚಡ್ ಆಜಾಪಾಚಿ ಸಂಗತ್ ಮ್ಹಳ್ಯಾರ್ ನೆಪೋಲಿಯನ್ ಮಸ್ತ್ ದುಬ್ಳ್ಯಾ ಕುಟ್ಮಾಂತ್ ಜಲ್ಮಲ್ಲೊ ಆನಿ ತಾಕಾ ತೆರಾ ವರ್ಸಾಂ ಪ್ರಾಯೆರ್ ಶಿಕಪ್ ಮುಕಾರ್ಸುಂಕ್ ಜಾಯ್ನಾಸ್ತಾನಾ ಕಾಮ್ ಕರಿಜೆ ಪಡ್ಲೆಂ. ಮಸ್ತ್ ಕಷ್ಟಾಂತ್‌ಚ್ ಜೀವನ್ ಸಾರ್‌ಲ್ಲ್ಯಾ ನೇಪೊಲಿಯನಾಚೆ ಸಪಣ್ ಜಾವ್ನ್ ಆಸ್‌ಲ್ಲೆಂಕೀ, ಲೇಖಕ್ ಜಾಂವ್ಚೆಂ. ಹೆಂ ಆಯ್ಕಲ್ಲೆ ಥೊಡೆ ಹಾಸೊನ್ ತೀನ್-ಚಾರ್ ವರ್ಸಾಂ ಇಸ್ಕೊಲಾಕ್ ಗೆಲ್ಲೊ ವ್ಯಕ್ತಿನ್ ಕಶೆಂ ಲೇಖಕ್ ಜಾಂವ್ಚೆಂ, ಸಾಧ್ಯ್‌ಚ್ ನಾ ಮ್ಹಣ್ ಮ್ಹಣ್ತಾಲೆ. ಆನಿ ಥೊಡೆ ದುಸ್ರೊ ದೇಶ್ ಕಳಿತ್ ನಾ.
ಬೂಕ್ ವಾಚುಂಕ್ ನಾ,
ದುಬ್ಳಿಕಾಯ್ ಸೊಸುನ್ ದುಸ್ರೊ ಕಾಂಯ್ ಆನ್ಬೋಗ್ ನಾ, ತುವೆಂ ಬರಂವ್ಕ್ ಸಾಧ್ಯ್‌ಚ್ ನಾ ಮ್ಹಣ್ ಮ್ಹಣಾಲೆ. ಅಶೆಂ ನಿರಾಶಾದಾಯಕ್ ಉತ್ರಾಂ ಆಯ್ಕೊನ್ ತಾಣೆ ತಾಚೆ ಸಪಣ್ ಸೊಡುಂಕ್ ನಾ. ಪಯ್ಲೆಂ ಏಕ್ ವ್ಹಡ್ ಸಬ್ದಾವಳ್ (ಡಿಕ್ಷನರಿ) ಕಾಣ್ಘೆಲೊ, ಹರ‍್ಯೇಕ್ ದೀಸ್ ನವೆ ನವೆ ಸಬ್ದ್ ಶಿಕೊನ್‌ಚ್ ಘೆಲೊ. ಥೊಡ್ಯಾ ತೆಂಪಾ ಉಪ್ರಾಂತ್ ತಾಚ್ಯಾ ಗಾಂವ್ಚ್ಯಾ ಲ್ಹಾನ್ ಪತ್ರಿಕೆಕ್ ಲೇಖನ್ ಬರಂವ್ಕ್ ಪ್ರಾರಂಭ್ ಕೆಲೆಂ.
ನೆಪೋಲಿಯನ್ ಹಿಲ್ ಹಾಣೆಂ ಕವನ್, ಕಾದಂಬರಿ ಬರವ್ನ್, ಜಿಣ್ಯೆಂತ್ ಜಿಕ್‌ಲ್ಲ್ಯಾ ಆನಿ ಗ್ರೇಸ್ತ್ ಜಾಲ್ಲ್ಯಾ ವ್ಯಕ್ತಿಂ ವಿಶ್ಯಾಂತ್ ಸಮ್ಜೊಂಚಿ ಮಸ್ತ್ ಉರ‍್ಬಾ ಆಸ್‌ಲ್ಲಿ ದೆಕುನ್ ತಾಂಚೆ ವಯ್ರ್ ವ್ಹಡ್ ವ್ಹಡ್ ಬೂಕ್ ಬರಯ್ಲೆ. ತ್ಯಾ ಶತಮಾನಾಚ್ಯಾ ಅತ್ಯಂತ್ ಗ್ರೇಸ್ತ್ ಆಂಡ್‌ಡ್ರ್ಯೀವ್ ಕಾರ್ನಿಗಿಚಿ ಪರಿಚಯ್ ಜಾಲಿ. ತಾಚೆಲಾಗಿಂ ವಿಚಾರ‍್ತಾನಾ ತಾಣೆಂ ನೆಪೋಲಿಯನಾಚಿ ಉರ‍್ಬಾ ಪಳೆವ್ನ್ ತುಂ ಜಿಣ್ಯೆಂತ್ ಜಿಕ್‌ಲ್ಲ್ಯಾ, ಸಾಧನ್ ಕರ್ನ್ ಉಂಚ್ಲ್ಯಾ ಮಟ್ಟಾಕ್ ಪಾವ್‌ಲ್ಲ್ಯಾ ವ್ಯಕ್ತಿಂಚೆಂ ಸಂದರ್ಶನ್ ಕರ್ ಆನಿ ತಾಂಚ್ಯಾ ಯಶಸ್ವೆಚೆಂ ಸೂತ್ರ್ ಕಸಲೆಂ ತೆಂ ವಿಚಾರುನ್ ತಾಂಚೆ ವಯ್ರ್‌ಚ್ ಏಕ್ ಬೂಕ್ ಬರಯ್ ಮ್ಹಣ್ ಸಲಹಾ ದಿಲಿ. ಸಲಹಾ ಸ್ವೀಕಾರ್ ಕೆಲ್ಲೊ ನೆಪೋಲಿಯನ್ ತಾಚ್ಯಾ ಕಾಳಾಚೆ ಪ್ರಸಿದ್ಧ್ ವ್ಯಕ್ತಿ ಜಾವ್ನ್ ಆಸ್ಚ್ಯಾ ಹೆನ್ರಿ ಪೋರ್ಪ್ (ಕಾರ್ ತಯಾರಕ್), ಥಾಮಸ್ ಅಲ್ವಾ ಎಡಿಸನ್ (ವಿದ್ಯುತ್ ಬಲ್ಪ್, ಗ್ರಾಮಾಫೋನ್ ಸಂಶೋಧಕ್) ರಾಕ್ ಫೆಲ್ಲರ್ (ಗ್ರೇಸ್ತ್ ಉದ್ಯಮಿ), ಚಾರ್ಲ್ಸ್ ಸ್ವ್ಯಾಬ್ (ಯಶಸ್ವಿ ಉದ್ಯಮಿ) ಪುಪ್ರೊ ವಿಲ್ಸನ್ (ಅಮೇರಿಕಾಚೊ ಅಧ್ಯಕ್ಷ್), ವಿಲಿಯಮ್ ರಿಗ್ಲಿ (ಚೂಯಿಂಗ್‌ಗಮ್ ತಯಾರಕ್), ಗ್ರಹಾಂ ಬೆಲ್ (ಟೆಲಿಫೋನ್ ಸಂಶೋಧಕ್) ಆಶೆಂ 500 ಕೀ ಚಡ್ ವ್ಯಕ್ತಿಕ್ ಸಂದರ್ಶನ್ ಕರ್ನ್ “ದಿ ಲಾ ಆಫ್ ಸಕ್ಸಸ್” ಮ್ಹಳ್ಳೊ 600 ಪುಟಾಂಚೊ ಬೂಕ್ ಪ್ರಕಟ್ ಕೆಲೊ. ತೊ ಧಿಡೀರ್ ನಾಂವಾಡ್ದಿಕ್ ಜಾಲೊ. ತಾಚೆ ಉಪ್ರಾಂತ್ ತಾಣೆ ಬರಯ್ಲಲೊ “ಥಿಂಕ್ ಆಂಡ್ ಗ್ರೋ ರಿಚ್” ಮ್ಹಳ್ಳೊ ಬೂಕ್ ಲಾಗಿ ಲಾಗಿಂ ಪಾಂಚ್ ಕೊರೊಡ್ ಪ್ರತಿಯೊಂಚ್ಯಾಕೀ ಚಡ್ ವಿಕುನ್ ಗೆಲೊ. ಆಶೆಂ ಹೊ ಕರೋಡ್ಪತಿ ಜಾಲೊಂ. ತಾಣೆ ಬರಯಿಲ್ಲೆ ಇತರ್ ಬೂಕ್ “ದಿ ಮಾಸ್ಟರ್ ಕೀ ಟು ರಿಚ್ಚಸ್” , “ಕೀ ಟು ಸಕ್ಸ್‌ಸ್” , “ಹೌ ಟು ರೈಸ್ ಯುವರ್ ಓನ್ ಸ್ಯಾಲರಿ”, “ಯು ಕ್ಯಾನ್ ವರ್ಕ್ ಯುವರ್ ಓನ್ ಮಿರಕಲ್ಸ್”, ಹೆ ಸರ್ವ್ ಬೂಕ್ ಆತಾಂ ಅತ್ಯಂತ್ ನಾಂವಾಡ್ದಿಕ್ ಜಾವ್ನಾಸಾತ್.
ನೆಪೋಲಿಯನ್ ಸಬ್ದಾವಳ್ ಕಾಣ್ಘೆವ್ನ್ ಪಯ್ಲೆಂ ಕೆಲ್ಲೆಂ ಕಾಮ್ ಕಿತೆಂ ಮ್ಹಳ್ಳೆಂ ಆತಾಂ ಕಳ್ಳೆಂಮೂ? ತೊಚ್ ತಾಂತುನ್ ಆಸ್ಲೊ ಅಸಾಧ್ಯ್ ಮ್ಹಳ್ಳೊ ಸಬ್ದ್ ಪುಸುನ್ ಕಾಡ್ಲೊ. ಆಮಿ ಆಮ್ಚ್ಯಾ ಜೀವನಾಚ್ಯಾ ಸಬ್ದಾವಳಿಂತ್ ಅಸಾಧ್ಯ್ ಮ್ಹಳ್ಳೊ ಸಬ್ದ್ ಕಾಡ್ನ್ ಉಡಯಾಂ. ನೆಪೋಲಿಯನ್ ಹಿಲ್ ತಾಚ್ಯಾ ಎಕಾ ಬುಕಾಂತ್ ತುಮಿ ತುಮ್ಚೆಂ ವಿರಾಮ್ ವೇಳ್, ಶಿಕ್‌ಲ್ಲೆಂ ಶಿಕ್ಷಣ್ ಆನಿ ತುಮ್ಚೆಲಾಗಿಂ ಆಸ್ಚೆ ಪಯ್ಶೆ ಕಶೆಂ ಉಪಯೋಗ್ ಕರ‍್ತಾತ್ ಮ್ಹಣ್ ಸಾಂಗ್ಲ್ಯಾರ್ ಆನಿ ಧಾ ವರ್ಸಾಂ ಉಪ್ರಾಂತ್ ತುಮಿ ಖಂಯ್ ಆಸ್ತಾತ್ ಆನಿ ಕಶೆಂ ಜಿಯೆತಾತ್ ಮ್ಹಣ್ ಹಾಂವ್ ಸಾಂಗ್ತಾ ಮ್ಹಣ್ತಾ.
ಹಾಚೊ ಅರ್ಥ್ ಇತ್ಲೊಚ್. ಗೆಲ್ಲೊ ವೇಳ್ ಪಾಟಿಂ ಯೆನಾ, ಶಿಕ್‌ಲ್ಲೆಂ ಶಿಕಾಪ್ ಕೊಣಾಕ್ ಚೊರುಂಕ್ ಜಾಯ್ನಾ, ಆಸ್‌ಲ್ಲೆ ಪೈಶೆ ತಶೆಚ್ ಉರನಾಂತ್, ತಿನ್‌ಯೀ ಸಂಗ್ತಿ ಸಾರ‍್ಕೆ ರಿತಿನ್ ಉಪಯೋಗ್ ಕೆಲ್ಯಾರ್ ಆಮ್ಕಾಂ ಆಸಾಧ್ಯ್ ಮ್ಹಳ್ಳೆಂ ಕಾಂಯ್ ನಾಸ್ತಾನಾ ಯಶಸ್ವಿ ವ್ಯಕ್ತಿ ಜಾವ್ಯೆತ್. ದೆಕುನ್ ಆಮಿ ಸರ್ವ್, ವೇಳ್ ಪಾಡ್ ಕರಿನಾಸ್ತಾನಾ ಏಕ್ ವಾ ಏಕ್ ಕ್ಷೇತ್ರಾಂತ್ ಯಶಸ್ವಿ ಜಾಂವ್ಕ್ ಪ್ರೇತನ್ ಕರ‍್ಯಾಂ. ಲೇಖಕ್‌ಚ್ ಜಾಂವ್ಕ್ ಮನ್ ಆಸ್ಲ್ಯಾರ್ ಕಶೆಂಯಿ ಆಮ್ಚೆಂಚ್ ಮ್ಹಳ್ಳೆಂ ಮರ್ಸಿ ಮಾಯೆಚೆಂ ಜಯ್ತ್ ಪತ್ರ್ ಆಸಾ, ತಾಕಾ ತುಮ್ಚಿ ಗರ್ಜ್ ಮಸ್ತ್ ಆಸಾ. ದೆಕುನ್ ಆಜ್ ಥಾವ್ನ್‌ಚ್ ಗಿಚ್ಚುಂಕ್ ಪ್ರಾರಂಭ್ ಕೆಲ್ಯಾರ್ ಮುಖಾರ್ ಏಕ್ ದೀಸ್ ತುಮಿ ರಾಷ್ಟ್ರ ಮಟ್ಟಾಚೆ ಸಾಹಿತಿ ಜಾವ್ಯೆತ್.
ಅಸಾಧ್ಯ್ ಮ್ಹಳ್ಳೆಂ ಕಾಂಯ್‌ಚ್ ನಾ ದೆಕುನ್ ಅಂತರಾಷ್ಟ್ರೀಯ್ ಮಟ್ಟಾಕ್‌ಯಿ ಪಾವೊಂಕ್ ಸಾಧ್ಯ್ ಆಸಾ. ತ್ಯಾ ದೆಕುನ್ ಆಮ್ಚೆ ಧ್ಯೇಯ್ ಜಾಂವ್ದಿ ಮ್ಹಾಕಾ ಸಾಧ್ಯ್ ಆಸಾ, ಖಂಡಿತ್ ಜಾವ್ನ್ ಮ್ಹಾಕಾ ಸಾಧ್ಯ್ ಆಸಾ.
- ಜೀನ್ ಲವಿನಾ ಮೊಂತೇರೊ, ಮರ್ಸಿ ವಾಡೊ, ಮಂಜೇಶ್ವರ್
No comments:
Post a Comment